ಸುಂದರವಾದ ಮೈಕಟ್ಟು ನಮ್ಮದಾಗಬೇಕು ಎಂದು ಪ್ರತಿಯೊಬ್ಬರೂ ಆಸೆ ಪಡುತ್ತಾರೆ. ಅದಕ್ಕೆ ಬೇಕಾದ ಕಸರತ್ತು ಅಥವಾ ಆಹಾರ ಪದ್ಧತಿಯನ್ನು ಅನುಸರಿಸುತ್ತಾರೆ. ಕೆಲವರು ದಪ್ಪ ಆಗಲು ಪ್ರಯತ್ನಪಟ್ಟರೆ ಇನ್ನೂ ಕೆಲವರು ಸಣ್ಣ ಆಗಲು ಪ್ರಯತ್ನಿಸುತ್ತಾರೆ. ಕೆಲವರಿಗೆ ಜೀವನ ಸ್ವಲ್ಪ ಆಹಾರ ತಿಂದರೆ ಹೊಟ್ಟೆ ತುಂಬಿದ ಅನುಭವ ಉಂಟಾಗುತ್ತದೆ.
ಇನ್ನು ಕೆಲವರು ಎಷ್ಟು ತಿಂದರೂ ದಪ್ಪ ಆಗುವುದಿಲ್ಲ. ಇದರಿಂದ ಬೇಸತ್ತು ಹೋಗಿರುತ್ತಾರೆ. ಎಲ್ಲಾ ಕಡೆ ಕೇವಲ ದೇಹದ ತೂಕವನ್ನು ಕಡಿಮೆ ಮಾಡಿಕೊಳ್ಳಬೇಕು ಎಂದು ವಿವಿಧ ಬಗೆಯ ತಂತ್ರಗಳನ್ನು ವಿವಿಧ ಆಯಾಮಗಳಲ್ಲಿ ವಿಚಾರಗಳ ರೂಪದಲ್ಲಿ ನೀಡಿದ್ದಾರೆ.
ಆದರೆ ದೇಹದ ತೂಕವನ್ನು ಹೆಚ್ಚು ಮಾಡಿಕೊಳ್ಳಬೇಕು ಎಂಬ ವಿಚಾರವನ್ನು ಹಂಚಿಕೊಂಡಿರುವ ಸಾಧ್ಯತೆ ಕಡಿಮೆ. ಇದರಿಂದ ಜನರಿಗೆ ಮಾಹಿತಿ ಕೊರತೆ ಉಂಟಾಗುತ್ತದೆ. ಈ ವಿಷಯದಲ್ಲಿ ಸಿಗುವ ಅಲ್ಪಸ್ವಲ್ಪ ವಿಚಾರವನ್ನು ನಂಬಲು ಮನಸ್ಸು ಬರುವುದಿಲ್ಲ.
ಮತ್ತು ಇದರಿಂದ ಬೇರೆ ಯಾವುದಾದರೂ ಅಡ್ಡಪರಿಣಾಮಗಳು ಉಂಟಾಗಬಹುದು ಎಂಬ ಭಯ ಕೂಡ ಇರುತ್ತದೆ. ಜೊತೆಗೆ ದಪ್ಪ ಆಗುವುದು ಎಂದರೆ ದೇಹದಲ್ಲಿ ಬೊಜ್ಜಿನ ಅಂಶವನ್ನು ತುಂಬಿಕೊಳ್ಳುವುದು ಎಂದು ಕೆಲವರು ತಿಳಿದುಕೊಂಡಿದ್ದಾರೆ.
ಆದರೆ ಈ ಲೇಖನದಲ್ಲಿ ಕೇವಲ ಆರೋಗ್ಯಕರವಾದ ಆಹಾರ ಪದಾರ್ಥಗಳನ್ನು ಮಾತ್ರ ಸೇವನೆ ಮಾಡಿ ಯಾವುದೇ ಅಡ್ಡಪರಿಣಾಮಗಳು ಉಂಟಾಗದಂತೆ ದೇಹದ ತೂಕವನ್ನು ಹೆಚ್ಚು ಮಾಡಿಕೊಳ್ಳುವ ಬಗೆಯನ್ನು ತಿಳಿಸಿಕೊಡಲಾಗಿದೆ.
ಒಣ ದ್ರಾಕ್ಷಿ ಹಣ್ಣುಗಳು
ಒಣದ್ರಾಕ್ಷಿ ಹಣ್ಣುಗಳಲ್ಲಿ ಅಪಾರ ಪ್ರಮಾಣದ ಕ್ಯಾಲೋರಿ ಅಂಶಗಳು ಸಿಗುತ್ತವೆ. ದೇಹದ ತೂಕವನ್ನು ಹೆಚ್ಚು ಮಾಡುವಲ್ಲಿ ಇವುಗಳ ಪಾತ್ರವನ್ನು ಮರೆಯುವಂತಿಲ್ಲ.
ಇದಕ್ಕಾಗಿ ನೀವು ರಾತ್ರಿ ಮಲಗುವ ಸಮಯದಲ್ಲಿ ಸುಮಾರು ಆರರಿಂದ ಎಂಟು ಒಣದ್ರಾಕ್ಷಿಗಳನ್ನು ನೀರಿನಲ್ಲಿ ನೆನೆಹಾಕಿ ಇಡೀ ರಾತ್ರಿ ಹಾಗೆ ಬಿಟ್ಟು ಮರುದಿನ ಬೆಳಗ್ಗೆ ಖಾಲಿ ಹೊಟ್ಟೆಯಲ್ಲಿ ಸೇವನೆ ಮಾಡುವ ಅಭ್ಯಾಸ ಇಟ್ಟುಕೊಳ್ಳಬೇಕು.
ಕೇವಲ 20 ದಿನಗಳಿಂದ ಒಂದು ತಿಂಗಳ ಒಳಗೆ ನಿಮಗೆ ನೀವು ಅಂದುಕೊಂಡ ಹಾಗೆ ಸಕರಾತ್ಮಕ ಪರಿಣಾಮಗಳು ಅರಿವಿಗೆ ಬರುತ್ತವೆ.
ಪೀನಟ್ ಬಟರ್
ಇದನ್ನು ಕಡಲೆಕಾಯಿಯ ಬೆಣ್ಣೆ ಎಂದು ಕರೆಯುತ್ತಾರೆ. ಇದರಲ್ಲಿ ಕೂಡ ಅತಿಹೆಚ್ಚಿನ ಪ್ರಮಾಣದ ಕ್ಯಾಲೋರಿಗಳು ಇರುವುದರಿಂದ ದೇಹದ ತೂಕವನ್ನು ಹೆಚ್ಚು ಮಾಡಲು ಅತ್ಯದ್ಭುತ ನೈಸರ್ಗಿಕ ಮನೆ ಮದ್ದು ಎಂದು ಕರೆಯಬಹುದು.
ನೀವು ಸೇವನೆ ಮಾಡುವ ಬ್ರೆಡ್ ಟೋಸ್ಟ್ ಮೇಲೆ ಪಿನಟ್ ಬಟರ್ ಹಾಕಿ ಸೇವನೆ ಮಾಡುವ ಅಭ್ಯಾಸ ಇಟ್ಟುಕೊಂಡರೆ ನಿಮ್ಮ ದೇಹದ ತೂಕ ಬಹಳ ಬೇಗನೆ ಹೆಚ್ಚಾಗುತ್ತದೆ. ಜೊತೆಗೆ ನೀವು ಸಾಧ್ಯವಾದಷ್ಟು ಶ್ರೀಘ್ರದಲ್ಲಿ ದಪ್ಪ ಕೂಡ ಆಗುತ್ತೀರಿ.
ಆಲೂಗಡ್ಡೆ
ನಿಯಮಿತವಾಗಿ ಆಲೂಗಡ್ಡೆ ತಿನ್ನುವ ಅಭ್ಯಾಸ ಇಟ್ಟುಕೊಂಡಿರುವವರಿಗೆ ದೇಹದ ತೂಕ ಬಹಳ ಬೇಗನೆ ಹೆಚ್ಚಾಗುತ್ತದೆ. ಏಕೆಂದರೆ ಇದರಲ್ಲಿ ಕಾರ್ಬೋಹೈಡ್ರೇಟ್ ಅಂಶದ ಪ್ರಮಾಣ ಸಾಕಷ್ಟಿದೆ.
ಜೊತೆಗೆ ಆಲುಗಡ್ಡೆ ರೆಸಿಪಿಗಳನ್ನು ಆಗಾಗ ಮನೆಯಲ್ಲಿ ತಯಾರು ಮಾಡಿಕೊಂಡು ಸೇವನೆ ಮಾಡುವ ಅಭ್ಯಾಸ ಇಟ್ಟುಕೊಂಡಿದ್ದರೆ ಬೇಗನೆ ನಿಮ್ಮ ದೇಹದ ತೂಕ ಹೆಚ್ಚಾಗಲಿದೆ. ಆಲೂಗಡ್ಡೆಯನ್ನು ಒಂದು ವಾರಕ್ಕೆ ಎರಡು ಬಾರಿ ಸೇವನೆ ಮಾಡುವ ಅಭ್ಯಾಸ ಇಟ್ಟುಕೊಳ್ಳಿ.
ಬಾಳೆಹಣ್ಣು ಮತ್ತು ಹಾಲು
ಇದನ್ನು ಬನಾನಾ ಮಿಲ್ಕ್ ಶೇಕ್ ಎಂದುಕೊಂಡರೂ ಪರವಾಗಿಲ್ಲ. ಬಾಳೆಹಣ್ಣಿನಲ್ಲಿ ಅಪಾರ ಪ್ರಮಾಣದ ಕ್ಯಾಲೋರಿಗಳು ಕಂಡುಬರುತ್ತವೆ. ದೇಹದ ಶಕ್ತಿಯನ್ನು ತಕ್ಷಣವೇ ಹೆಚ್ಚಾಗಿಸಲು ಇದು ಅನುಕೂಲಕಾರಿಯಾಗಿ ಕೆಲಸ ಮಾಡುತ್ತದೆ.
ಪ್ರತಿದಿನ ಬೆಳಗ್ಗೆ ಖಾಲಿ ಹೊಟ್ಟೆಯಲ್ಲಿ ಒಂದು ಬಾಳೆಹಣ್ಣು ಮತ್ತು ಒಂದು ಲೋಟ ಹಾಲು ಸೇವನೆ ಮಾಡುವ ಅಭ್ಯಾಸ ಇಟ್ಟುಕೊಂಡರೆ ದೇಹದ ಸದೃಢತೆಗೆ ಮತ್ತು ಆರೋಗ್ಯಕರವಾದ ಮೈಕಟ್ಟಿಗೆ ತುಂಬಾ ಒಳ್ಳೆಯದು.
ಸಕ್ಕರೆ ಮತ್ತು ಬೆಣ್ಣೆ
ನಿಮ್ಮ ದೇಹದ ತೂಕವನ್ನು ಹೆಚ್ಚಿಸಿಕೊಳ್ಳಲು ಇನ್ನೊಂದು ಸುಲಭವಾದ ಪರಿಹಾರ ಎಂದರೆ ಬೆಣ್ಣೆ ಜೊತೆ ಸಕ್ಕರೆಯನ್ನು ಮಿಶ್ರಣ ಮಾಡಿ ಸೇವನೆ ಮಾಡಬೇಕು. ಆದರೆ ನೆನಪಿರಲಿ ಬೆಣ್ಣೆಯ ಪ್ರಮಾಣದಲ್ಲಿ ಸಕ್ಕರೆಯನ್ನು ಕೂಡ ತೆಗೆದುಕೊಳ್ಳಬೇಕು.
ದಿನದ ಯಾವುದಾದರೂ ಸಮಯದಲ್ಲಿ ಊಟಕ್ಕೆ ಮುಂಚೆ ಖಾಲಿ ಹೊಟ್ಟೆಯಲ್ಲಿ ಮೊದಲು ಸಕ್ಕರೆ ಮತ್ತು ಬೆಣ್ಣೆಯ ಮಿಶ್ರಣವನ್ನು ಸೇವನೆ ಮಾಡಿ ನಂತರ ಆಹಾರ ಸೇವನೆ ಮಾಡುವುದರಿಂದ ಕೇವಲ ಒಂದು ತಿಂಗಳಲ್ಲಿ ನಿಮ್ಮ ದೇಹದ ತೂಕ ಹೆಚ್ಚಾಗುವುದು ಮಾತ್ರವಲ್ಲದೆ ಮೊದಲಿಗಿಂತ ನೀವು ದಪ್ಪ ಕೂಡ ಆಗುವಿರಿ.
ಬಾದಾಮಿ ಹಾಲು
ನಾವು ಬಾದಾಮಿ ಹಾಲನ್ನು ಕೇವಲ ಆಗೊಮ್ಮೆ-ಈಗೊಮ್ಮೆ ಕುಡಿಯುತ್ತೇವೆ. ಆದರೆ ಪ್ರತಿದಿನ ಇದನ್ನು ಕುಡಿಯುವ ಅಭ್ಯಾಸ ಮಾಡಿಕೊಂಡರೆ ಎಲ್ಲಾ ಆಯಾಮದಲ್ಲೂ ದೇಹಕ್ಕೆ ತುಂಬಾ ಒಳ್ಳೆಯದು ಎಂದು ಹೇಳುತ್ತಾರೆ.
ಕಣ್ಣಿನ ದೃಷ್ಟಿಗೆ, ಬುದ್ಧಿಶಕ್ತಿಯ ವೃದ್ಧಿಗೆ, ದೇಹದ ನಿರೋಧಕ ಶಕ್ತಿಯನ್ನು ಹೆಚ್ಚಿಸಲು ಹೀಗೆ ಎಲ್ಲಾ ವಿಧದಲ್ಲೂ ಇದು ಅನುಕೂಲಕಾರಿಯಾಗಿ ಕೆಲಸ ಮಾಡುತ್ತದೆ.
ಬಾದಾಮಿ ಹಾಲಿನ ಜೊತೆ ಹಸಿ ಅಥವಾ ಒಣ ಕರ್ಜುರ ಮತ್ತು ಒಣದ್ರಾಕ್ಷಿ ಹಾಕಿ ಸೇವನೆ ಮಾಡುವ ಅಭ್ಯಾಸ ಇಟ್ಟುಕೊಳ್ಳಬೇಕು. ಇದರಿಂದ ದೇಹಕ್ಕೆ ಸಾಕಷ್ಟು ಪ್ರಮಾಣದಲ್ಲಿ ಪೌಷ್ಟಿಕಾಂಶಗಳು ಸಿಗುತ್ತವೆ. ನಿಮ್ಮ ದೇಹ ಆರೋಗ್ಯಕರವಾಗಿರುತ್ತದೆ.
